Планинарот од Монтана, кој исчезна минатата недела, е пронајден мртов. Се верува дека е убиен од гризли.
Безживотното тело на Крег Клуатр (40) од Ливингстон, беше пронајдено еден ден откако отиде на планинарење со пријател, но подоцна не се појави на договорената локација.
– Тие се разделија. Кога другиот маж се врати во нивното возило, а неговиот пријател го немаше, почнавме со потрага, рече шерифот на округот Парк, Бред Бичлер.
Официјалните лица не објавија детали за тоа каде е пронајдено телото на Крег или зошто веруваат дека тој бил убиен од гризли, објави Њујорк пост.
Потрагата започна во средата вечер со тимови на земја и хеликоптери во воздух кои ја пребаруваа областа околу Сикс Мил Крик на планината Абсарока, северно од Националниот парк Јелоустоун.
Крег се пресели од родниот Масачусетс во Монтана пред повеќе од две децении. Таму ја запозна својата сопруга Џејми и реши да изгради куќа.