Владата на Република Северна Македонија ја започна денешната седница со едноминутно молчење и оддавање почит на жртвите во двата инцидента, што се случија во Белград и Младеновац во Србија.
На денешната владина седница, надлежните министерства информирале за активностите што се преземаат во земјава во делот на превенцијата во училиштата, како и на државно ниво, така и за заштита од каков било вид насилство.
– Од страна на Министерството за внатрешни работи е информирано дека во континуитет се преземаат активности во делот на превенцијата и дека се применуваат протоколите за безбедносна проверка за влез и излез на учениците во училиштата и околината од училиштата. Ваквите протоколи што се активирани по лажните дојави за бомби, сега ќе бидат засилени со дополнителни активности од страна на МВР, соопштија од владината прес-служба.
На седницата од Министерството за образование и наука информирале дека се изготвува прирачник за училиштата за постапување по однос на превенција од врсничко насилство и други видови насилство, како и дека се работи и на зајакнување на стручните психолошко – педагошки служби, таму каде има потреба.
Од денеска е отворена и електронска адреса [email protected], или на албански [email protected] каде што ќе се пријавува врсничко насилство и по секоја пријава ќе се постапува веднаш.
Како што се наведува во соопштението, разгледани се можностите за одржување средби меѓу задолжени екипи на МВР и педагозите и психолозите во училиштата, според предвидена динамика, со цел да се придонесе во пријавувањето на евентуално врсничко насилство или други видови проблеми во надлежност на министерствата за внатрешни работи и за образование и наука.
Со цел вклучување на сите засегнати министерства, следуваат средби како со МВР, така и со Министерството за труд и социјална политика и со Министерството за здравство.
На владината седница задолжени се Министерството за образование и наука и Министерството за внатрешни работи да изготват Стратегија за превентивни активности, со чекори на државно ниво по којашто ќе бидат задолжени да постапуваат сите училишта, со цел рана превенција и заштита од несакани инциденти во училиштата и надвор од нив.