Претседателот на здружението на сопственици во индустриската зона Визбегово, Нухи Алиу, се пожали дека тие како сопственици на големи компании кои го полнат Буџетот, немаат никаков фидбек во интервенции во инфраструктурата во зоната.
– Не знаеме од каде да почнеме. Имаме проблеми затоа што зоната припаѓа на три општини, на Бутел, на Карпош и на Град Скопје. Оваа зона има 800 милиони евра приход годишно, има 40 милиони евра профит годишно, зона која има 5.000 вработени и која учествува во БДП со 7,5 отсто. Да се мисли повќее на зоната затоа што го полни буџетот на државата, треба да се направат елементарните услови за функционирање. Секој ден менуваме гуми поради лошиот пат. Има опасност од инциденти со оние шахти кои се монтирани на патот. Наместо со асфалт, правени се со бетон, а тука поминуваат тешки возила.
Имавме иницијатива заедно со комората и пуштивме едно писмо до Данела Арсовска и инсистиравме со неа да имаме комуникација, но немаме комуникација со неа. Ние пред изборите и дадовме шанса да ни ги каже своите определби и рече дека во нејзината изборна програма нашите проблеми ќе бидат вметнати и ќе ги реши во текот на мандатот – рече Алиу.