Илјадници луѓе денеска продолжија да протестираат во француските градови против спорниот план за пензиски реформи на претседателот Емануел Макрон, кој е во завршна фаза во парламентот. Работниците во транспортот и другите сектори излегоа на штрајк, иако во помал број од претходно, додека претставниците од двата дома на парламентот се состанаа за да разговараат за компромисниот предлог-закон за реформи.
В четврток Сенатот, а потоа и Националното собрание ќе гласаат за предлогот и доколку двата дома дадат зелено светло, реформата ќе биде усвоена. Клучната точка на реформата е зголемувањето на старосната граница за пензионирање од 62 на 64 години. Дополнително, треба да се зголеми бројот на години кои мора да се уплатуваат во пензискиот систем, а минималната пензија ќе се зголеми на 1.200 евра.
Реформата се смета за клучен проект на Макрон и неговата влада од десниот центар, а се објаснува со заканата од дефицит во пензискиот фонд. Плановите освен синдикатот ги критикуваше и дел од опозицијата. Бидејќи таборот на Макрон повеќе нема апсолутно мнозинство во парламентот, претседателот се надева на поддршка од конзервативните републиканци в четврток. Останува нејасно дали доволен број пратеници ќе гласаат за реформата.