На социјалните мрежи се појави информација со фотографија дека во населбата Карпош 4 во Скопје наводно биле нападнати 11 жени и притоа се извршени тешки кражби.
„А1он“ побара одговор од Министерството за внатрешни работи кои ги демантираше овие дезинформации што се шират по групите на Фејсбук.
„Во врска со вашите прашања упатени до нас за објави на социјалните мрежи за наводно нападнати 11 жени и наводно извршени 70 тешки кражби во Карпош, Секторот за внатрешни работи Скопје при МВР целосно ги демантира ваквите дезинформации.
Согласно статистичките податоци, периодот од 01.01.2023 до 14.02.2023 година на подрачјето на ЕВР Карпош пријавени се 2 (две) тешки кражби во куќи и 4 (четири) тешки кражби во станови за кои се преземаат мерки и активности за нивно расчистување“, велат од МВР.
Во однос на делот од прашањето за наводни напади на 11 жени на подрачјето на Карпош во полицијата во период од 01.01.2023 до 14.02.2023 пријавени се 2 (две) тешки кражби на дрзок начин и 1 (едно) кривично дело Обид за разбојништво. Кривичните дела се расчистени и против лицето Д.М. (39) од Скопје е поднесена кривична пријава до Основното Јавно Обвинителство.