На денешната седница на словачкото Собрание, вербалната пресметка на двајца пратеници прерасна во тепачка.
Независниот пратеник Алојз Хлина, го нападна својот колега Антон Мартвоњ од партијата Смер – Социјална демократија откако овој му упати неколку навредливи зборови.
Мартвоњ го нарече Хлина, губитник кој ги критикува извршителите кои сакаат да го подобрат своето функционирање, а самиот се збогатил со продажба на алкохол на малолетни лица.
– Изговарајќи фактичка белешка бев нападнат од пратеникот Хлина, што се случи првпат во историјата. Ниеден пратеник, освен Мечијар никогаш никого не нападнал. Тој ме зграпчи за врат и ме бутна на столот од висина од околу пола метар, објасни Мартвоњ.
Тој додаде дека притоа колегата му ги скинал пантолоните и му се заканувал.
Во врска со настанот, кој добро може да се види и на видео снимката, Хлина арогантно одговара:
– Морам да ја корегирам таа изјава. Јас никого не нападнав. Да го нападнев сега ќе лежеше во болница. Мартоњ не е моја класа.