Пратениците на правната комисија во бугарскиот Парламент го отфрлија ветото на претседателот Румен Радев за Изборниот законик поради враќањето на хартиеното гласачко ливче, јави дописникот на МИА од Софија. Со отфрлање на ветото на претседателот на Бугарија, направените амандмани остануваат и изборите повторно ќе може да се гласаат со хартиено ливче.
Гласањето во Правната комисија на бугарскиот парламент ги повтори измените на Изборниот законик. Со 12 гласа на ГЕРБ, БСП и ДПС беше отфрлено ветото на бугарскиот претседател. 11 гласа ги поддржаа мотивите на Румен Радев – тие дојдоа од „Продолжуваме со промената“, „Демократска Бугарија“, „Бугарски подем“ и „Преродба“.
Претседателот на Бугарија Радев во причините за наметнувањето на ветото истакна дека во најголем дел од изборните делови на гласачот му се остава да го одреди начинот на гласање – на хартија или машински, наместо законот да го одредува според категорични и дефинирани критериуми. По собраниската комисија за правни прашања, ветото на претседателот Румен Радев во комората треба да го поднесе и Народното собрание.
Политички аналитичари во Бугарија сугерираат дека Бугарската социјалистичка партија може да го преиспита своето мислење и да се усогласи со ветото на претседателот Радев, како можност да се врати на позициите на старите коалициски партнери од „ Продолжуваме со промената“ и „Демократска Бугарија“ за да можат заедно да владеат во нова идна коалиција.
Извор: МИА