Москва го назначи главниот инженер на окупираната украинска нуклеарна централа Запорожжја, Јуриј Черничук за директор на централата, соопшти руската државна нуклеарна агенција Росенергоатом. Таа позиција беше празна од октомври, кога претходниот шеф на електраната беше киднапиран од руските сили, според Киев.
Нуклеарната централа Запорожје во источна Украина е најголемата во Европа и е под руска окупација од март. Од септември не произведува струја, но во неа се уште работи украински персонал, кои се грижат за безбедноста. Во октомври Москва објави дека ја става нуклеарната централа под контрола на нејзините нуклеарни институции, што Киев го прогласи за незаконски потег.
Меѓусебни обвинувања за гранатирање на нуклеарната централа
Украинската државна нуклеарна агенција Енергоатом во мај соопшти дека Русите му забраниле на Черничук да го напушти градот Енерходар, каде што се наоѓа нуклеарната централа, и ја обвини Русија дека го држи него и другиот персонал како заложници. Фабриката со шест реактори беше цел на повеќекратни напади, што предизвика осуда од Меѓународната агенција за атомска енергија, која повика да се прогласи безбедна зона околу неа. Москва го отфрли тој предлог.
Русија и Украина меѓусебно се обвинуваат за гранатирање на нуклеарната централа, која се наоѓа на страната на реката Днепар под контрола на руските сили. Киев, исто така, ја обвини Москва за поставување воена опрема во нуклеарната централа, што Русија го негира.