Владеачкото мнозинство кое го предводат СДСМ и ДУИ не гласаше за измените на законот за зголемување на субвенциониран студентски оброк од 120 на 160 денари предложени од опозицијата, но гласаше за потребата за законски измени во законот за аудио и аудиовизуелни медиуми кои ќе значат враќање на државното финансирање во медиумите.
Власта по студентскиот протест пред Собранието се договори со студентите да им покачи 30 денари плус за оброкот, односно од 120 на 150 денари за оброк, но тоа да важи од март, а дотогаш студентските организации треба да бидат вклучени во изработката на новото законско решение.
Ова е само 10 денари помалку од предлогот за измена на законот на ВМРО-ДПМНЕ за субвенциониран оброк што требаше да се донесе сега и да важи уште од тековната академска година.
Сумата за субвенциониран оброк е ништо во однос на сумата која ќе се потроши откако ќе се изгласаат измените на законот за ААВМУ со кој се предвидува враќање на јавните кампањи во медиумите финансирани со пари од граѓаните.
Околу три милиони евра од колачот од пет милиони евра ќе легнат на сметка на петте национални телевизии. Според експертите, овој предлог на законски измени ќе ги фаворизира само големите телевизии и ќе создаде клиентелизам.
– Ни ги одбија сите закони за заштита на граѓаните од сиромаштија, вклучувајќи ги и измените на законот за субвенциониран оброк од 120 до 160 кои требаше да се носат по скратена постапка. Утре ќе им го поднесеме во форма на амандман на нивниот закон, но сигурно пак ќе го одбијат – истакна за „А1он“, Игор Здравковски пратеник на ВМРО-ДПМНЕ и член на Комисијата за образование, наука и спорт.
На предложените измени неколкупати реагираше ААВМУ сметајќи дека се проблематични, почнувајќи од дефинирањето на кампањите од јавен интерес, начинот на спроведување и особено нивното финансирање со средства од државниот буџет и од буџетите на локалната самоуправа.
Со измените, финансирањето на кампањите од јавен интерес се обезбедува од буџетот во висина од задолжителни 0,1 отсто. Од овие средства, 80% се наменети за кампањи за јавен интерес кои ќе се емитуваат само на национални телевизии, а другите 20 отсто се наменети за регионални телевизии и радија на државно и регионално ниво.