Анкета на „Галуп интернешнел Балкан“ покажа дека доколку сега има предвремени парламентарни избори во Бугарија, нема да има значителна разлика со резултатите од изминатите избори на 2 октомври, јави дописникот на МИА од Софија.
Според анкетата, ГЕРБ би добила 25,5 отсто од гласовите, „Продолжуваме со промените“ – 20,8 отсто, Движењето за права и слободи – 13,1 отсто, „Преродба“ – 10,5 отсто, БСП – 9,4 отсто, „Демократска Бугарија“ – 8 отсто. „Бугарски подем“ на Стефан Јанев е околу влезната бариера со 4,5 проценти, а под него останува „Има таков народ“ на Слави Трифонов со 3,1 отсто. „Исправи се, Бугарија“ и ВМРО се со 1,3 и 0,9 проценти.
Според истражувањата, се гледа дека нема посебни промени во бугарското јавно мислење и во месецот по изборите не се случиле посебни поместувања на силите, забележуваат социолозите од агенцијата.
Истражувањето било спроведено „лице в лице“ со таблети во периодот од 29 октомври до 6 ноември меѓу 809 полнолетни бугарски државјани.