И покрај критиките во јавноста дека во извештајот не постојат директни укажувања за уставни прекршувања, а уште помалку кој треба да ја понесе политичката одговорност, потпретседателката на опозициската СДСМ Радмила Шекеринска вели дека е задоволна од исходот.
Таа смета дека она што е важно е дека „ВМРО-ДПМНЕ со своите потписи потпишала капитулација и го признала она што во изминатите осум месеци го тврди опозицијата“, пренесува Утрински весник во новинарскиата сторија „Нема да има оставки за 24 декември“.
– Навикнати сме на однесувањето на владејачката партија која деновиве за потребите на својата публика се обидува да негира дека го потпишала документот, што не е точно – оценува Шекеринска .
– Не беше целта да се лоцира одговорноста, туку да се утврди вистината за она што се случи. Кој е виновен за она што се случи провејува низ целиот извештај. Ако владејачката партија имаше доблест и политичка култура и досега ќе ја утврдеше одговорноста и немаше да чека на тоа да посочи Комисијата – смета вториот човек на социјалдемократите.
Таа е убедена дека без оглед на тоа дали ќе остане и натаму претседателот на Собранието Трајко Вељаноски кој има целосно нарушен легитимитет, ВМРО-ДПМНЕ веќе ја плаќа политичката цена за 24 декември. Според неа, казната на граѓаните ќе се случи на избори, пренесува Утрински.