Делумни неофицијални резултати од претседателските избори во Словенија, по пребројани речиси 45 отсто од гласовите, покажуваат дека новиот претседател ќе се избира во вториот круг, во кој, се чини сега, ќе бидат Анже Логар и Наташа Пирц Мусар.
На веб-страницата на словенечката Државна изборна комисија беше објавено дека за Логар гласале 34,02 отсто од гласачите, а за Пирц Мусар 26,86 отсто.
На трето место е Милан Брглез со 15,60 отсто, потоа следат Владимир Пребилич (10,33 отсто), Сабина Сенчар (6,10 отсто), Јанез Циглер Краљ (4,30 отсто) и Миха Кордиш (2,77 отсто).
Избирачките места во Словенија се затворени вечерва во 19 часот. Мнозинството гласови ќе се пребројат до 21 часот, соопшти словенечката Државна изборна комисија.
Излезноста до 16 часот беше 34,8 отсто, што е за околу два отсто повеќе од пред пет години, пренесе агенцијата СТА.