Владата на Црна Гора и Собранието не успеаја на дело да ја покажат својата посветеност на реформската агенда во однос на Европска Унија, се нагласува во нацрт-извештајот на Европската комисија.
– Поларизацијата на политичките тензии и отсуството на ангажман меѓу политичките партии и неуспехот да се изгради консензус за клучните прашања од национален интерес продолжи и доведе до пад на две поделени влади за време на гласањето за недоверба, јави Радио телевизија на Црна Гора (РТЦГ) повикувајќи се на делови од извештајот.
ЕК наведува дека договорот за Српската православна црква (СПЦ) имал влијание врз политичката атмосфера и предизвикал зголемување на тензиите.
Експертите на ЕК истакнуваат дека не е постигнат напредок во однос на сеопфатната реформа на изборната правна и институционална рамка, вклучувајќи ги препораките на Организацијата за безбедност и соработка во Европа (ОБСЕ) и Канцеларијата за демократски институции и човекови права (ОДХИР) по набљудувачката мисија на парламентарните избори во Црна Гора одржани во 2020 година.
Во извештајот е нотирано дека работата на Собранието е обележана со бојкоти на владејачкото мнозинство и на опозицијата, промени во Владата и смена на двајца претседатели на Собранието.
Во извештајот, Црна Гора доби висок рејтинг во однос на усогласеноста со надворешната политика на ЕУ. Се посочува дека земјата целосно ги усогласила сите одлуки на ЕУ, вклучително и рестриктивните мерки на Унијата по не испровоцираната агресија на Русија врз Украина.
ЕК тврди дека Црна Гора ги координира своите ставови со позициите на ЕУ, вклучително и Светската трговска организација, и одржува добра соработка со меѓународните организации.
Црна Гора генерално одржува добри билатерални односи со другите земји во процесот на проширување во регионот и со соседните земји-членки на ЕУ, се истакнува во извештајот и се наведува дека станува збор за континуирана соработка.
Сепак, во извештајот се посочува дека односите меѓу Црна Гора и Србија „остануваат предизвик“. Исто така, се додава дека двете страни сигнализираат поголема подготвеност за „ресетирање“ на односите и работа на решавање на отворените прашања.
Во извештајот се оценува дека Црна Гора постигнала само ограничен напредок во правосудниот систем. Спроведувањето на клучните реформи во правосудството остануваат во застој.
Во документот посветен на Црна Гора се споменува дека се извршени долгорочни именувања на судии на високо ниво, додека уште неколку други, вклучително и Уставниот суд, сè уште се чекаат.
Во документот се истакнува дека јавниот радиодифузен сервис РТЦГ продолжил да произведува „политички избалансирана и разновидна содржина“. Во документот се посочува дека е постигнат само ограничен напредок во борбата против корупцијата и дека минатогодишните комисии за препораки биле „само делумно“ исполнето од властите во Подгорица.
Воедно, се оценува дека состојбата во спречувањето на корупцијата е дополнително подобрена, особено поради, како што се смета, позитивниот тренд во работата на Агенцијата за борба против корупцијата.
ЕК во извештајот предупредува дека треба да се направи повеќе за да се обезбеди интегритет, непристрасност и отчетност на Агенцијата и да се подобрат нејзините опипливи резултати и довербата на јавноста.
Во извештајот се наведува дека Црна Гора постигнала „одреден напредок“во борбата против организираниот криминал во однос на препораките од минатата година, особено во однос на ефикасноста на криминалните истраги. Во документот е нагласено дека е вратена целосната употреба на посебните истражни мерки.
Сепак, експертите на ЕК наведуваат дека е неопходно да се зајакнат конкретните резултати во судските одлуки за шверц со тутун и перење пари, користење на финансиски истраги и капацитети за конфискација на приноси од криминал.
Но, заклучуваат експертите на Европската комисија, недостатокот на ефикасно судско следење на важни стари случаи сè уште предизвикува сериозна загриженост.
Извор: МИА