Претседателот на СДСМ, Димитар Ковачевски, вечерва, по затворањето на гласачките места и завршување на вонредните локални избори за градоначалник ги посети граѓаните на Центар Жупа. Во оваа општина веќе се прославува извесната победа на кандидатот за градоначалник од владината коалиција, Аријан Ибраим.
„Заедно со граѓаните сакам да ја честитам победата на Аријан Ибраим за градоначалник на Центар Жупа. Граѓаните на Центар Жупа со својата одлука потврдија дека знаат кој е вистинскиот правец по кој треба да се движи општината но и државата. Граѓаните го поддржаа кандидатот на владејачката коалиција, предложен од ТДП, Аријан Ибраим . Беа победени сите оние деструктивни сили кои сакаа изборите во Центар Жупа да не успеат. Граѓаните знаат дека изборот на градоначалник значи понатамошен развој на општината, понатамошно инфраструктурно развивање на општината и затоа го направија вистинскиот избор, а тоа е Аријан Ибраим“, рече Ковачевски во обраќањето од Центар Жупа.
Претседателот Ковачевски рече дека изборниот ден беше одлично организиран, државата покажа демократски капацитет како што доликува на земја членка на НАТО и идна членка на ЕУ.
Услов за успех на денешните избори во Центар Жупа беше одѕив на гласачите од една третина. Според информациите на ДИК, до 18.30 часот во оваа општина на гласање излегле 46,3 отсто.