Европската комисија нема да може да ја принуди Полска да го почитува новиот план на ЕУ за намалување на потрошувачката на гас. Ниту, пак, Полска ќе ги дели своите резерви на гас со другите членки на блокот, изјави министерката за клима и животна средина Ана Москва за полската медиумска куќа Шеци (Сиечи).
„Енергетската безбедност е ексклузивна надлежност на секоја држава и никогаш нема да се согласиме да ја отстапиме на Европската унија. Никој не може да не принуди да ја регулираме потрошувачката на гас или да воведеме други рестриктивни мерки. Не сакаме да носиме одлуки за ограничувања во други држави “, велат од Москва, пренесува Раша тудеј.
Планот на ЕУ за помала потрошувачка на гас ќе ги стабилизира цените
Нејзините коментари се однесуваат на планот на ЕУ земјите-членки да ја намалат потрошувачката на гас во целиот блок за 15 отсто, со цел да се наполнат складиштата на гас пред зимата, поради можниот прекин на испораката на рускиот гас.
Москва во интервјуто истакна дека планот на ЕУ не е обврска и дека затоа треба да се гледа како насоки, а не како на закон.
„Тоа ќе биде на доброволна основа, а одлуката за тоа прашање е во суверена јурисдикција на секоја земја“, нагласи таа.
Иако се чини дека планот на ЕУ не вклучува споделување на резервите на гас меѓу членките, Москва сепак подвлече дека Полска во секој случај ќе го задржи својот гас за себе.
„Никој нема да ни го одземе гасот. Нагласувам – ЕК не може да нè принуди на ништо. Нема солидарност без слобода, која завршува таму каде што почнува принудата“, рече таа и додаде: „Инфраструктурата, гасоводите и купениот гас се сопственост на нашата држава и само ние одлучуваме како ќе ја користиме и за чии потреби“.
Наведувајќи дека „доколку има земји во ЕУ кои имаат соодветни капацитети и инфраструктура, тие секогаш, врз основа на билатерален договор, можат да ги поддржат своите соседи“, Москва оцени дека е малку веројатно Брисел да и наметне обврска на Полска во однос на обезбедување на таква помош.