По пауза од четири години, поради недостиг на кадар, одделението за ортопедија од кумановската општа болница повторно функционира. Минатиот месец на одделението имало над 700 прегледи и интервенции.
– Во овој период функционира само амбулантскиот дел со двајца ортопеди, но имаме силна поддршка од менаџерскиот тим на болницата, така што наскоро очекуваме да работиме во целосен состав, што освен амбулантскиот дел вклучува и оперативен дел и ехо дијагностика, вели специјалистот по ортопедија, доктор Стефан Трајановски.
Тој информира дека од септември се очекува да пристигне и ехо апарат со што ќе се овозможи навремено откривање на вродено исчашување на колкови кај новороденчиња.
– Очекуваме бројката на пациентите од септември тројно да се зголеми, вели Трајановски.
Одделението за ортопедија во кумановската болница постои веќе четириесет години.