Министерот за надворешни работи на Турција, Мевлут Чавушоглу денеска во Анкара има средба со рускиот колега Сергеј Лавров, јави Анадолија.
Планирано е да се разговара за билатералните односи, како и ситуацијата во Украина и во Сирија.
„Продолжуваат интензивните разговори на високо ниво. Претседателот на Русија, Владимир Путин и претседателот (на Република Туркије) Реџеп Таип Ердоган, разговараа телефонски деветпати годинава“, се наведува во соопштение на руското Министерство за надворешни работи.
Во документот се истакнува дека продолжуваат и контактите меѓу руските и турските министерства и институции.
„Министрите ќе разговараат и за ситуацијата во Украина, Јужен Кавказ, Блискиот Исток, Северна Африка, Централна Азија и за Црно Море. Двајцата министри ќе разговараат и за моменталната ситуација за време на кризата во Украина и ќе разменат мислења за можноста повторно да се почне со мировни преговори меѓу Русија и Украина“, пишува во соопштението.
Ќе се разговара и за ситуацијата во Сирија.
Извор: МИА