Руските сили напредуваат во неколку области северно од градот Славјанск во источна Украина, откако го завршија прегрупирањето на војниците, соопшти Генералштабот на вооружените сили на Украина.
Во последните 24 часа, осум цивили загинаа, а 11 се повредени во регионот на Доњецк, откако руските сили гранатираа 15 области, се наведува.
„Руските единици се фокусираат на офанзивни операции за опкружување на нашите војници во Северодоњецк и Лисичанск и за блокирање на главните логистички патишта“, соопшти војската.
„Рускиот генерал Александар Дворников доби задача до 10 јуни или целосно да го окупира Северодоњецк, или целосно да го отсече автопатот Лисичанск-Бахмут и да го стави под контрола“, изјави Серхиј Хајдаи, шеф на регионалната воена управа на Луганск.
„Значи, огромна количина на сила, сè што имаа, сите резерви – сè беше искористено за да се исполнат овие две задачи“, рече тој.