Британските власти денеска соопштија дека ќе ги преземат сите неопходни чекори за да го заштитат мирот во Северна Ирска и ја повикаа Европската унија да покаже уверливост во преговорите за решавање на проблемите со трговските правила по Брегзит.
Лондон и Брисел со месеци се обидуваат да го надминат ќорсокакот околу договорот што последователно создаде царинска граница меѓу Северна Ирска и остатокот од Велика Британија.
Британија сака целосна ревизија на договорот, додека ЕУ бара измени во рамките на одредбите од постојниот договор.
„Ќе продолжиме да разговараме со ЕУ, но нема да дозволиме тоа да застане на патот на заштитата на мирот и стабилноста во Северна Ирска“, се вели во британскиот документ објавен денеска заедно со новата владина законодавна агенда.
Застојот околу таканаречениот северноирски протокол го блокира формирањето на нова извршна власт таму по минатонеделните избори.
Велика Британија наведе дека може да биде принудена да дејствува еднострано за да избегне ескалација на политичките тензии кои би можеле да го загрозат мирот од 1998 година, кој стави крај на децениското насилство.
Тајмс вчера објави дека британската министерка за надворешни работи Лиз Трас се подготвува да отфрли големи делови од Протоколот за Северна Ирска откако се откажа од преговорите со европската страна.
Извор: МИА