„Овој човек не може да остане на власт“, изјави вчера американскиот претседател Џо Бајден за рускиот претседател Владимир Путин во последните моменти од неговиот говор во Варшава.
На ова веднаш реагираше Кремљ.
„Господинот Бајден нема да одлучува за тоа. Тоа може да биде само избор на народот на Руската Федерација“, рече портпаролот на Путин како одговор на изјавата на Бајден дека Путин не може да остане на власт.
Но, Белата куќа се обиде да ја минимизира изјавата на Бајден за Путин.
Веднаш по говорот на американскиот претседател пристигна „појаснување“ од Белата куќа во кое се наведува дека Бајден не повикал на промена на режимот во Москва. Поентата на претседателот беше дека не треба да му се дозволи на Путин да има моќ над соседните земји.
„Поентата на претседателот беше дека на Путин не може да му се дозволи да владее со своите соседи или со регионот. Тој не зборуваше за моќта на Путин во Русија или за промена на режимот“, рече претставник на Белата куќа.
Би-би-си во анализата наведува дека ова е јасен обид да се повлечат зборовите на Бајден. Имено, Вашингтон е загрижен дека изјавата на Бајден може да изврши дополнителен притисок врз Путин и „да го направи уште понестабилен“.
Со оглед на тоа дека Путин е шеф на државата кој има огромни проблеми со инвазијата на Украина, а во исто време контролира нуклеарниот арсенал, Американците се загрижени бидејќи не сакаат да го турнат Путин во ќош.
Директен повик за промена на режимот во Москва, верува Вашингтон, може да предизвика нестабилност и да ја зголеми непредвидливоста. И последното нешто што го сакате во ваква ситуација е непредвидливоста, наведува Би-би-си.