Со брза интервенција на Противпожарната единица-Штип локализиран е пожарот што утрово избувна во лакавичкиот регион во близина на патотот Штип-Радовиш.
Пожарот зафати три викендици, ниско стеблеста шума, трла, и други стопански објекти, во тој регион. Брзата интервенција на пожарникарите спречи огнената стихија да се прошири и на околните викенд куќи и да предизвика поголема материјална штета.
– Со наша брза интервенција пожарот е локализиран, спасени се викендиците. Причината за пожарот според мое лично мислење е човечки фактор. Не може да се запали од стакло или од било што друго, појасни Кирчо Патраклиев, командир на Противпожарната единица-Штип. Пожарот е локализиран.
Митко Павлов, сопственик на викендичка вели дека пожарот почнал околу 5 часот рано утринава, а откако излегол надвор забележал густ чад, кој се издигал од околните објекти.
– Веднаш дотрчав и јавив на пожарната. Имаше ветер и брзо се ширеше. Дојдоа пожарникарите, гаснеа, има неколку вили зафатен, рече Павлов.
Во текот на летната сезона пожарникарите интервенирале на 12 пожари, а во светиниколскиот регион синоќа изгорела фарма за свињи и сточна храна.
