СДСМ денеска обвини дека ВМРО-ДПМНЕ сака да ја избегне одговорноста за инцидентите од 24 декември во Собранието и затоа не го решава проблемот што се појави со повлекувањето на претседателот на Комисијата Борче Давитковски.
Генералниот секретар на партијата Оливер Спасовски на прес-конференција рече дека ако требало Комисијата да работи без претседател, таа би почнала со работа уште на 16 март, а не на 11 јуни.
– СДСМ направи се, покажа политичка волја, испочитува се од мартовскиот договор, се врати во Собранието, предложи свои кандидати во Комисијата кои активно учествуваа во нејзината работа. СДСМ не може да ги преземе и одговорностите на власта и ВМРО-ДПМНЕ. Да требало Комисијата да работи без претседател таа ќе почнеше со работа уште на 16 март, а не на 11 јуни кога беше постигнат договор за претседателот на Комисијата, истакна Спасовски.
Прашан дали ќе бараат консултации за нов претседател на Комисијата, Спасовски рече дека тоа е работа што треба да ја покрене претседателот на државата.
– Нашиот став е дека Комисијата мора да има претседател за да може да работи во полн состав, потенцира Спасовски.
СДСМ бара од власта да го испочитува договорот од 1 март, направен во присуство на дипломати од Брисел.
