Грчките гранични служби задржале, а потоа вратиле Македонец, кој има и американско државјанство од границата. Оставени без било какво образложение или можност да се обратат до Aмериканската амбасада, во семејството на Џемаил Рамуш се сомневаат дека причина е тоа што во пасошот како родно место е наведена Струга – Република Македонија.
– Мојот вујко пред десетина дена патуваше со неговата сопруга преку Истанбул и Грција, од каде сакаа да продолжат до Македонија. На аеродромот му кажале дека не може да влезе. Го задржале во притвор половина час, а потоа му се заканиле дека ќе го затворат ако не се врати назад во Турција, што тој морал да го стори. Не му дале никакво образложение. Му кажале само дека Грција не ја признава Македонија, но неговата сопруга, која патувала со македонски пасош ја пуштиле, вели Мемет Рамуш, внук на вратениот американски државјанин.
Мемет Рамуш вели дека семејството се обратило до Грчката и до Македонската амбасада во Вашингтон, но од Грците не добиле никаков одговор или образложение поради што дошло до овој инцидент. Американската амбасада во Атина препорачала доколку повторно имаат проблеми, да им се обратат на самото место. При задржувањето на Џемаил Мемет, грчките полицајци воопшто не му дале време и не му дозволиле да се обрати до амбасадата на САД во Атина.