На продолжението од првата седница на Советот, градоначалникот на Општина Центар, Горан Герасимовски, во воведното обраќање појасни дека СДСМ, иако е најбројна советничка група, нема да предложи кандидат за претседател на Советот, информира СДСМ Центар
„Општина Центар е пример и ќе остане пример за демократски начин на функционирање. Иако имаме најголем број на советници во групата, оставам можност на помалите советнички групи да дадат предлози за претседател на Советот. Ве повикувам на овој избор, сите да гласате по сопствено убедување и вашиот глас да го дадете според сопствен избор“, им порача Герасимовски на советниците.
Од предложените двајца кандидати, Марија Среброва од Левица освои 5 од 23 можни гласа, а Јане Димески од „Шанса за Центар“, ја одби кандидатурата, што е доволно јасен показател дека „Шанса за Центар“ одбива да работи во интерес на граѓаните, вели СДСМ Центар.
На продолжението на 3-тата седница на Советот на Општина Центар, советниците со 20 гласа „за“ го донесоа Буџетот на општината за 2022-ра година, единствено советниците на „Шанса за Центар“ не ја дадоа својата поддршка, додаваат од СДСМ Центар.
„Со недавањето на поддршката за Буџетот на општината, „Шанса за Центар“ освен што одби да работи во интерес на граѓаните, одби да гласа за субвенции за жителите, одби да поддржи подобар и похуман живот во општината, одби да даде поддршка на социјалните политики кои ги води општината и не ја поддржа реализацијата на сите останати општински активности и политики. Со недавањето на денешната поддршка на гласањето на Буџетот, „Шанса за Центар“ свесно одлучи да ја блокира работата на општината.
Ги повикуваме советниците од „Шанса за Центар“, наместо празни обвинувања и паушални критики, изнесени пред сѐ на социјалните мрежи, да се вклучат во работата на советот со конструктивни и издржани предлози и проекти.
Апелираме, наместо да го трошат времето на обвинувања кон градоначалникот и советничката група на СДСМ, да ги засукаат ракавите и со конкретни решенија да бидат дел од Советот на општината, сѐ со цел да ја направиме Општина Центар подобро и поубаво место за сите нас“, соопштува СДСМ Центар.