Едно лице е прободено со нож, а шестмина се здобиле со исеченици и повреди по главите во групна тепачка во Гостивар во која учествувале единаесет помлади лица, соопшти СВР Тетово. Тројца од учесниците во тепачката се задржани во полициска станица.
Во тепачката, А.Д. (24) од гостиварското село Мало Турчане се здобил со убодна рана. Набрзо бил згрижен во гостиварската болница по што е пренесен на скопските клиники.
Според СВР Тетово, тепачката започнала на улица „ЈНА“ во Гостивар, помеѓу шест лица на возраст од 19 до 24 години од Гостивар, Мало Турчане, Равен и Лакавица и пет лица од Добри Дол на возраст од 19 до 23 години.
Увид на местото извршиле истражен судија и јавен обвинител, притоа е пронајден и подигнат е ножот, за кој се претпоставува дека е користен при повредувањето и кој ќе се вештачи.
Тројца од учесниците, Н.А (22), А.Ј (22) и Ф.И (23), од Добри Дол, се приведени и задржани во Полициската станица Гостивар.
Полицијата работи на расветлување на поединостите поврзани со овој случај.
За помалку од десет дена, ова е втор случај на ранување со нож во тепачка. Еден од тепачите, минатата недела заработи триесетдневен притвор.