Приведени две лица од Скопје кои вчеравечер превезувале мигранти на автопатот Табановце – Куманово.
Како што соопшти МВР, вчера во 22:10 часот на ул.„11 Октомври“ во Куманово и во 22:20 часот во село Никуштак, општина Липково, полициски службеници од Полициската станица за граничен надзор Сопот и Полициското одделение Матејче ги лишиле од слобода Ш.Б.(36) од село Сингелиќ, скопско и Г.Ј.(46) од Скопје.
Околу 22 часот на автопатот Табановце-Куманово, полициски службеници го забележале Ш.Б. како со возило „фиат линеа“, со скопски регистарски ознаки, превезува мигранти. Истовремено, на истата локација бил забележан и Г.Ј., како со возило „рено флуенс“, со скопски регистарски ознаки, превезува мигранти.
Двајцата не застанале на даден знак за запирање, но во 22:10 часот Ш.Б. бил сопрен и во неговото возило биле пронајдени четири лица – мигранти од Индија, додека во 22:20 часот во село Љубодраг, кумановско, биле пронајдени уште пет лица – мигранти, кои од возилото ги симнал Г.Ј.. Малку подоцна во село Никуштак, Г.Ј. бил запрен и лишен од слобода.
Возилата биле одземени, а мигрантите биле спроведени во Транзитен центар. По целосно документирање на случајот, додава МВР, против лицата ќе бидат поднесени соодветни пријави.