Американскиот државен секретар Џон Кери почна нов круг блискоисточна дипломатија, во обид да не дозволи кризата во Египет и во Сирија да попречи на напорите за обновување на замрзнатите израелско-палестински мировни преговори.
Кери пристигна денеска во Јордан во шеста официјална посета на регионот, откако стана државен секретар. Овој пат, тој меѓутоа, не планира да патува до Израел или палестинските автономни територии.
Кери ќе разговара со шефовите на дипломатиите на земјите од Арапската лига за напорите да ги врати Израелците и Палестинците на преговарачка маса и ќе ја разгледа ситуацијата во Египет и во Сирија.
Во Аман тој ќе се сретне со кралот на Јордан Абдула Втори и министерот за надворешни работи Насер Џуде, а ќе има и работна вечера со палестинскиот претседател Махмуд Абас.
Се предвидува Кери да се врати во САД во четврток.