Стотици демонстранти и вечерва се собираат пред зградата на Министерскиот совет во Софија, на 32-от ден на протести против Кабинетот на бугарскиот премиер Пламен Орешарски, јави БТА.
Протестите почнаа на 14 јуни по изборот на Делјан Пеевски за директор на Државната агенција за национална безбедност (ДАНС), чие именување подоцна беше поништено од Собранието, по што прераснаа во собири со барање за оставка на Владата.
Освен плакати со повици за оставка на владиниот Кабинет, на вечерашните протести демонстрантите извикуваат и „Граѓаните во власта, веднаш“.
Од друга страна, околу сто лица повтроно се собраа и вечерва на контра-протести во поддршка на Владата. Тие соопштија дека досега собрале 165.000 потписи во поддршка на Кабинетот на Пламен Орешарски и одново го обвинија бугарскиот претседател Росен Плевнелиев дека „создава поделби меѓу луѓето“.