Над 25 домашни и странски експерти од 10 држави ќе присуствуваат на конференцијата за е-трговија во земјава што четврти пат ќе се одржи на 12 ноември годинава под мотото „Ready, set, grow!”. Меѓу учесниците најавени се и претставници од „Вибер“, „Алибаба“ и „Спотифај“.
На панел дискусиите и во неформалните разговори со учесниците на конференцијата, светските експерти ќе го пренесат своето искуство и знаења за можностите за раст на бизнисите во е-трговијата по многубројните адаптации направени речиси во сите сфери на работењето во време на пандемијата.
Организаторите на конференцијата најавуваат учество на директорката за глобални клучни клиенти, Шарон Гаи од „Алибаба“, на директорот за продажба за Централна и Југоисточна Европа од „Вибер“, Константин Костадинов и на Ана Горка од „Спотифај“.
Конференцијата ќе се одржи во хибриден формат, односно со физичко присуство во хотелот „Хилтон“ и преку интернет.
– Картите веќе се пуштени во продажба по специјална цена од 199 евра за физичко присуство и 49 евра за онлајн следење на конференцијата, информираат организаторите.
Генерален партнер на конференцијата и годинава е „Мастеркард“, а „А1 Македонија“ е дигитален партнер. Организациски партнер е Фондот за иновации и технолошки развој.