Лекарите, медицинските сестри, но и немедицинскиот персонал од октомври во Хрватска ќе можат да одат на работа во здравствените установи само со дигитална ковид-потврда соопшти министерот за здравство Вили Берош.
Здравствените работници ќе треба да исполнуваат еден од трите услови, вакцинација, прележана болест или негативен ковид тест.
Формално, одлуката за ова ќе биде донесена следната седмица, а во сила ќе биде од почетокот на наредниот месец.
„ Воведувањето на ова правило ќе биде од почетокот на следниот месец. За ваква организација сепак треба малку повеќе време. Мора да имаме состаноци со диркторите на болниците, а и вработените ќе имаат некое време да донесат одлука за вакцинација“ – вели Берош кој најави и дека е во тек набавка на тестови за здравствените работници.
Тестирањето во првата фаза ќе им биде бесплатно, но се размислува по одреден период, тестирањето да го прават на сопствен трошок затоа што како што вели министерот, од здравствените работници се очекува да бидат вакцинирани.