Жената која на протестите сечеше маски како знак на непочитување на мерките против корона, но и против вакцинацијата, денеска и самата носеше маска. Додека чекаше автобус на постојката спроти хотелот „Карпош“, демонстрантката од минатите протести маската ја носеше на лице.
Споредено со протестите кога од самиот почеток ја извади маската, а по повикот од останатите присутни да не се почитуваат мерките за заштита од коронавирусот, овојпат, таа ја спушти под брада во моментот кога си купи сладолед.
За разлика од Гордана Гоџо која заедно со неа сечеше маски, жената која сепак овојпат ги почитува мерките, не говореше на протестот иако беше во првите редови. На протестите, преку мегафон беше повикано присутните да ги тргнат маските по што еден од присутните реплицираше: „Имам право на глас, имам право на слобода“.
Протестот во неделата беше против мерките на Владата за заштита од коронавирусот. Но, на него имаше говори со кои се негираше постоењето на коронавирусот кој беше изедначен со обичен грип, беа испратени пораки против вакцинацијата, вакцината беше наречена „обична водичка“, беше исвиркана Владата, докторите беа наречени „убијци“, новинарите – платеници. На него, беа упатени и навредливи и вулгарни зборови за министерот за здравство, Венко Филипче.