Русија денеска остро ги осуди Франција, Шпанија и Португалија поради блокадата на летот на боливискиот претседател Ево Моралес од Москва за Ла Паз.
Авионот на Моралес вчера мораше принудно да слета во Виена поради сомнеж дека во него се наоѓа американецот Едвард Сноуден.
– Акцијата на француските, шпанските или португалските власти тешко може да се смета како пријателски чин кон Боливија или Русија, соопшти руското Министерство за надворешни работи.
Претседателот на било која држава е личност што ужива меѓународна заштита, истакна министерството.
Русија во Обединетите нации ќе побара строго почитување на меѓународното право, што гарантира неповредливост на претседателските права и забранува нарушување на нивната личност, слобода и достоинство, се наведува во соопштението на руското Министерство за надворешни работи.
Авионот на боливискиот претседател Моралес се врати синоќа во Боливија по непланираното 14-часовно задржување во Виена.