Британското Министерство за надворешни работи ги предупреди денеска Британците да ги одбегнуваат сите патувања во Египет, освен во случај на крајна нужда и потреба.
Ова предупредување се однесува за целата територија на земјата, вклучувајки ги Луксор и Асуан и локациите со спомениците од фараонскиот период на Египет. Предупредувањето на Форин Офисот не се однесува само за брегот на Црвеното Море и на Синај.
Британците може да патуваат до одморалиштата Шарм ел Шеик, Таба, Нувеиба и Дахаб, како и до манастирот Света Катерина на Синајскиот Полуостров, но само ако ги користат аеродромте во Шарм ел Шеик и Таба.
Предупредувањето доаѓа пред денешното истекување на ултиматумот на воениот врв од 48 часа за смирување на тензиите меѓу претседателот Мохамед Морси и египетската опозиција, која се противи на „засилената исламизација“ на Египет.
Морси синоќа ја предупреди војската да остане настрана и нагласи дека ако треба „револуцијата“ ќе се брани и со „мачеништвото“ на нејзините следбеници.
Во насилствата во Египет што избуваа во петокот, загинаа преку 20 лица, а стотици други се повредени. Во Александрија е убиен еден американски турист, а во Каиро се регистрирани преку речиси сто силувања на жени.