Голем број кафулиња, ресторани, апартмани и хотели во Пефкохори се уште се затворени, а плажите се подготвени, но празни, пишува денешен „Блиц“. Дождот паѓал во текот на целиот ден, па оттаму недостигала и навала на туристи.
Локалните угостители за „Блиц“ изјавиле дека се подготвени за сезоната и дека допрво ги очекуваат првите туристи. Сепак, вниманието поради коронавирусот и понатаму е присутно и се води сметка околу мерките. Маските се задолжителни секаде, освен на плажите и во угостителските објекти додека се јаде и се пие.
„Мерките се такви, маските се задолжителни и на отворено и на затворено. Единствено можат да се извадат во кафулињата и во рестораните“, изјавил еден угостител.
Казните за неносење маски се строги – изнесуваат дури 300 евра.
„Токму поради тоа поголем број од луѓето носат маски“, вели друг угостител за „Блиц“.
Впечатокот бил дека Пефкохори во моментов живее во исчекување, пред се да се подобри времето, за да почнат да доаѓаат туристи. За следните денови најавени се повисоки температури.