Жителите на Ново Маало информираат дека денеска и официјално поднеле петиција до Владата на РСМ и Општина Центар со која бараат, како што велат, итно да постапат согласно законите и да овозможат изградба на комплексот кој е предвиден да се гради на паркингот на Холидеј Ин.
На петицијата, со преку 330 потписи се потпишани жители на Ново Маало, но и соседи од Градски ѕид и граѓани кои го разбираат нашиот проблем и ни даваат поддршка, за што им упатуваме благодарност, велат жителите.
„Ова го бараме, затоа што, за прв пат по децении талкање низ лавиринтите на системот, семејствата кои живеат во услови како од 19 век, конечно добиваат можност за достоен живот. Со оваа петиција, даваме поддршка и на инвеститорот кој нуди обештетување на семејствата, а преку истата, најостро ги осудуваме најавите и барањата на поединци, организации и институции за стопирање на проектот.
Сметаме дека никој нема право да одлучува за тоа како ние ќе живееме. Нема да дозволиме заради нивните неразумни барања да останеме да живееме во супстандарди услови, прокиснати кровови, септички јами, нерешено греење и депонија за отпад. На сите оние кои реагираат дека овој простор ќе стане бетонска џунгла и заслужува зеленило, им укажуваме дека сега освен калдрма по сокаци, кал до колена и распукан бетон на паркинг нема ништо друго“, соопштуваат жителите на Ново Маало.
„Бараме Опшина Центар или било која друга институција воопшто да не помислува да го суспендира планот. Ако тоа се случи, ние жителите на Ново Маало сме подготвени да излеземе на протест. Никој никому не смее да ускратува право на нормален живот, за кој ние со години се бориме. А тие кои бараат планот да се суспендира нека дојдат да живеаат во нашите трошни куќи, кои не можевме ниту да ги реновираме, со задоволство ќе се замениме со нивните удобни станови.
На крај, потенцираме дека оваа Петиција е последно известување до институциите. Ние сопствениците од Ново Маало сме подготвени да ги превземеме сите правни механизми. Ако некој со суспензија ни ги загрози правата ќе поднесеме колективна тужба за претрпена огромна штета од 1930 до 2021 година, ако треба и до Стразбур. Дополнително, ќе поднесеме пријава до Управна инспекција заради непостапување на општината“, се додава во соопштението на група граѓани, жители на Ново Маало.