Министерот за транспорт и врски Благој Бочварски вели дека службите на Министерството ќе постапат веднаш доколку Општина Центар до нив достави елаборат за суспензија на спорниот ДУП за парцелите спроти Холидеј Ин каде треба да се градат висококатници. Досега од општината испратиле само прашалник како да се изработи елаборатот.
Законот за урбанистичко планирање, повтори денеска Бочварски, е јасен, односно деталните урбанистички планови се сопственост на општините.
-Во моментот кога ќе го добиеме барањето од која било општина, дали е Центар или која било, во рок од 15 дена ќе се изјасниме во однос на суспензија на тој план, тоа е наше мислење коешто се враќа во Советот на матичната општина и потоа гласат советниците. Додека не добиеме барање за суспензија или елаборат за суспензија ние немаме предмет по кој ќе постапуваме. Не знам зошто се создава слика дека некој нешто избегнува да одговори или јавноста не е запознаена, или се создава некаква забуна кога реков и повторувам дека во моментот кога ќе се добие тој елаборат ќе ја информирам јавноста секако и ќе постапиме во законскиот рок за потоа да го вратиме предметот во општината да си се изјасни, изјави Бочварски.
Елаборат, повтори, немаме добиено и не можам да постапувам за нешто што е спротивно на законот. – Во момент кога ќе добиеме елаборат за суспензија го процесуираме, нашите служби ќе постапат веднаш и ќе го вратиме во Општина Центар, така што и градоначалникот потврди дека елаборат не е доставен, тој доставил прашалник како да се изработи елаборатот. Елаборатот го изработуваат стручните служби на Општина Центар, Комисијата за урбанизам, и го доставува до Министерството за транспорт и врски, рече Бочварски, одговарајќи на новинарско прашање по потпишувањето на договорт за брз автобуски превоз во Скопје.
По укинувањето на мораториумот за градење во Општина Центар со одлука на Уставниот суд, уследи потпишување на петиција против најавената изградбата на висококатниците, а такво барање до Владата испратија и повеќе граѓански организации. Жителите на населбата Ново Маало на локацијата кај што треба да се гради го поддржуваат проектот. Тие најавија дека денеска ќе достават петиција до надлежните институции за да се реализира проектот.
Инвеститорот „МГ Фешн“ преку електронскиот систем на Општината поднел барање за градежна дозвола, а изградбата може да се спречи доколку Советот на Општина Центар донесе одлука за суспензија, но штетите доколку се влезе во постапката за суспензија, а не се постигне посакуваниот ефект, ќе ги сноси Општината.
Од Асоцијацијата на архитекти на Македонија (ААМ) и Академијата на архитекти вчера порачаа да се почитува генералниот урбанистички план и јавниот интерес.Како архитекти, истакнаа оттаму, не сме против градење, ниту против личните и бизнис интереси на поединци, доколку тие не го загрозуваат квалитетот на животниот простор и јавното добро.
– ААМ е за доследно почитување на целите, проекциите и планските решенија од Генералниот урбанистички план на град Скопје 2012-2022 год. и плановите од пониско ниво мора да бидат усогласени со овој стратешки план. Тоа се однесува и на планот во чиј состав е оваа локација спроти хотелот „Холидеј Ин“, но и за сите останати за кои постои интерес во јавноста како што се фабрикатаТреска, Дебар Маало, Мал Ринг, Езеро Треска, Расадник и т.н. Деталните урбанистички планови, кои претставуваат акти од јавен интерес, треба да содржат креативни решенија, кои на жителите, корисниците и посетителите на просторот ќе им овозможат негово безбедно, квалитетно и комфорно користење и доколку не е така истите мораат да бидат коригирани, соопштија од ААМ.