Претседателот на СДСМ, Зоран Заев денеска се сретна со шефот на мисијата на ОБСЕ во Македонија, Ралф Брет при што изразил задоволство од формирањето на Комисијата за настаните од 24 декември и ги акцентираше очекувањата за ефикасност во работата.
Како што соопшти СДСМ, амбасадорот Брет го поздрави и демократскиот амбиент и демократската постапка во која се спроведе 14. Конгрес на СДСМ и ги искажа своите очекувања од оваа партија за клучните прашања кои се важни за напредокот на Република Македонија.
Претседателот Заев, пак, го информираше амбасадорот за плановите на новото раководство на СДСМ и насоките на идно политичко делување на партијата, како и за позициите околу клучните прашања кои се од интерес на државата и граѓаните.
Двајцата разговараа и за меѓуетничките односи во државата, состојбата со медиумите и процесот на лустрација како теми од исклучителна важност за Република Македонија, стои во соопштението од СДСМ.