Владата ќе ги достави измените на Законот за здравствена заштита до Собранието, а со кои, ќе се регулира колку пари можат да наплатат приватните болници од пациентите заразени со коронавирус кои се на лекување. Кога пратениците ќе ги изгласаат измените, болниците нема да можат да наплатат повеќе од 4.959 евра.
„Денеска на седница на Влада е Законот за здравствена заштита со чии измени предлагаме цените во приватните болници да бидат изедначени со референтните цени утврдени од Фондот за здравствено осигурување. Со измените во Законот дијагонстицирање и лекување на ковид пациенти предлагаме да се движи од 40.000 до 305.000 денари. Државата освен што има овластување да склучи договор со приватните болници преку ФЗО, може да постави и лимит за максимален износ на едно приватно лекување од Ковид 19. Регулирањето на цените е неопходно за да не се доведеме во ситуација приватните здравствени установи да останат недостапни за огромно мнозинство на граѓани во нашата земја. Ги повикувам сите пратеници во Собранието да дадат поддршка на оваа регулација на цените за здравствени услуги на ковид пацинети во приватните болници“, напиша министерот за здравство, Венко Филипче.
Според Филипче, кога пратениците ќе ги изгласаат измените, цените за третман на пациенти во приватните болници ќе бидат финансиски издржливи за сите граѓани.