Комисијата на епидемиолози од Министерството за здравство на Грција, утре ќе одржи состанок за да ја разгледа епидемиолошката слика во земјата и можноста за олабавување на рестрикциите како што е отворање на малопродажбата или на училиштата, но и да се укине забраната за движење меѓу општините.
Во грчките медиуми понеделник се споменува како можен термин за отворање на продавниците, а владината портпаролка Аристотелиа Пелони во интервју за радиото „Параполитика“ рече дека Владата на комисијата и претставила рамка со опции за одредени активности и очекуваат одговор.
Останува отворено прашањето како денешните податоци за ситуацијата со Ковид-19 во земјата ќе влијаат на утрешните одлуки на надлежната комисија со оглед на тоа дека беа регистрирани рекорден број нови случаи, рекорден број на пациенти приклучени на апарати, но и зголемен број направени тестови.
Националната организација за јавно здравје соопшти 4.340 нови случаи на Ковид-19, првпат над 4.000 од почетокот на пандемијата, починаа 72 лица, а 741 пациент е приклучен на апарати на Одделите за интензивна нега во грчките болници.
Во изминатите 24 часа биле направени 23.158 ПЦР тестови и 42.821 рапид тест.
Од почетокот на пандемијата, починаа вкупно 8.017 лица, а регистрирани се 260.077 позитивни случаи.
Грција од 7 ноември 2020 година е во карантин и со воведен полициски час, со исклучок на мали временски периоди кога постоеше олабавување на мерки, додека пак областа Атика, поширокиот регион на Атина во строг карантин е од 11 февруари.