Уште две лица починале во Саудиска Арабија од новиот коронавирус, близок до причинителот на таканаречената атипична пневмонија (тежок остар респираторен синдром или ТОРС), пренесе ДПА, повикувајќи се на Министерството за здравство.
Со тоа вкупниот број жртви на новиот респираторен вирус Блискоисточен респираторен синдром (БИРС) во Кралството достигна 28.
БИРС низ светот ја предизвика смртта на најмалку 33 лица, се наведува во податоците на Светската здравствена организација (СЗО), цитирани од британските медиуми.
Последните двајца починати во Саудиска Арабија се странци, на возраст од 46 и 21 година. Од септември до сега во оваа блискоисточната земја БИРС е дијагностициран кај најмалку 46 лица.
Случаи на зараза беа регистрирани уште во Јордан, Катар, Обединетите Арапски Ммирати, Тунис, Германија, Франција и Велика Британија. ТОРС пред 10 години ја предизвика смртта на околу 800 лица.