Членовите на Ад-хок комисијата за расчистување на случувањата пред и во Собранието на 24 декември минатата година денеска ја утврдија динамиката на работа, согласно која, во наредните 20-тина дена ќе има секојдневни состаноци на кои ќе се прегледуваат документи и изјави од Собранието, од пратеничките групи и од пратеници кои за неколку дена ќе треба да ги достават до Комисијата.
– За тоа има консензус и меѓусебно разбирање, претседателот на Комисијата Борче Давитковски, кој како што било договорено на денешната прва седница ќе ги дава изјавите за јавноста за нејзината работа.
Тој истакна дека се разгледувала и драфт верзијата на Деловникот за работа, а оти наскоро се очекува да се договори дали одлуките ќе се носат со консензус или со мнозинство гласови.
– Дојдовме до средина, до 15-от член бидејќи можеби ќе има мониторинг. Ќе дојдат од ЕУ, а можеби ќе дојдат и набљудувачи. И тоа треба да го предвидиме, кои права ќе имаат луѓето, рече Давитковски.
Тој е задоволен од начинот на меѓусебната комуникација. Атмосферата, како што рече, ветува дека нема да има посериозни проблеми со цел ефикасно завршување на обврската.
– Ќе напишеме писмо, да ни се обезбеди соодветна логистика. Да има записник на еден компјутер и фотокопир, истакна Давитковски.
Формирањето на Комисијата е обврска од мартовскиот договор постигнат меѓу власта и опозицијата, во присуство на европската тројка.
Според динамиката на работата на Комисијата, Давитковски очекува да се запази рокот од два месеца за подготвување на Извештајот за настаните од 24 декември минатата година.