Во првиот разговор на претседателот на САД, Џо Бајден со саудискиот крал Салман бин Абдулазис ал Сауди била потврдена „американската посветеност да и помогне на Саудиска Арабија во одбрана на својата територија додека е соочена со напади од групи поврзани со Иран“.
Во соопштението на Белата куќа се наведува дека Бајден ја „потврдил важноста на универзалните човекови права и владеењето на правото“ во Саудиска Арабија. Тој го пофали и ослободувањето на активисти од саудиските затвори.
Бајден и ал Сауди разговарале и за обновените дипломатски напори за завршување на војната во Јемен.
– Нашата администрација е фокусирана на поправање на односите. Сигурно постојат подрачја каде ќе изразиме загриженост и ќе ја оставиме отворена опцијата на одговорност. Исто така постојат подрачја каде ќе продолжиме да работиме со Саудиска Арабија со оглед на заканите со кои се соочува регионот, изјави портпаролката на Белата куќа. Џен Псаки.
САД наскоро ќе објави разузнавачки извештај за убиството на саудискиот новинар Џамал Кашоги во октормври 2018 година во Конзулатот на Саудиска Арабија во Истанбул.