Здружението на безбедносните сили „Бедем“ денеска остро ја осуди изјавата на Зоран Заев, новиот председател на СДСМ, во која говори за бранителите и за припадниците на поранешната „ОНА“.
Претседател на „Бедем“, Горан Димовски изјави дека на Заев очигледно не му е доволно јасно кој во 2001 година ја бранеше Република Македонија, кој го чуваше територијалниот интегритет и суверенитет.
– Недозволиво е тој да го нарекува Законот за посебни права на бранителите за политичка грешка и решавањето на бенефициите на оние кои ја штитеа Македонија, да го става во пакет со некакви права на оние кои ни ја напаѓаа државата. Кој е Зоран Заев да го погазува нашето достоинство и достоинството на оние кои ги дадоа своите животи за оваа држава.Тој мора итно да се извини за својата изјава, рече денеска претседател на „Бедем“, Димовски.
Според него, таа изјава е срамна и со неа длабоко ги навредува бранителите.
– Му порачуваме на Зоран Заев дека ние сме патриоти, и за разлика од него не се срамиме од тоа. Такви сме биле и кога на Македонија и било најтешко , такви ќе останеме и во иднина, изјави претседател на „Бедем“, Димовски.