Првиот вицепремиер и министер за политички систем и односи меѓу заедниците Артан Груби одржа работен состанок со амбасадорот на Република Косово Ѓерѓ Дедај.
За време на состанокот тие разговарале за актуелните теми во земјата и за важни настани што се во интерес на Република Северна Македонија и Република Косово.
Груби, како што соопштија од неговиот Кабинет, во оваа пригода ја истакнал својата надеж дека во Република Косово на 14 февруари ќе се одржат слободни и демократски избори.
Двајцата соговорници разговарале и за процесот на поранешните лидери на Република Косово, кои во моментов се во Хаг.
Со амбасадорот на Косово разговарале и за европската интеграција на земјава, но и за отвореното прашање со Бугарија.
Груби и Дедај се согласиле дека процесот на попис во земјата е процес што треба да се спроведе, бидејќи последниот беше спроведен во 2002 година. Груби му посочил на амбасадорот Дедај дека пописот на населението е потребен со цел да се спроведат еднакви и фер политики.
Aмбасадорот Дедај му се заблагодарил на првиот вицепремиер Груби за меѓувладината соработка и заемната поддршка на институциите на Северна Македонија и Косово, но и за одржувањето на одличните односи меѓу нашите две земји, во сите области и во однос на заедничката европска перспектива.
Соговорниците Груби и Дедај размениле мислења и за други политички теми во земјата и во регионот.