Се молам на Бога да ги насочите своите напори за помирувањето во САД и во светот, порача денеска поглаварот на Римокатоличката црква, папата Франциск, во честитката до американскиот претседател Џо Бајден, кој денеска беше инаугуриран на највлијателната позиција во светот.
„Во оваа прилика на Вашата инаугурација како 46-от претседател на Соединетите Американски Држави, Ви испраќам добри желби и уверувањето на моите молитви дека Семоќниот Бог ќе Ви даде мудрост и сила во исполнувањето на Вашата висока функција,“ напиша Папата Франциск.
Британските медиуми наведуваат дека папата Франциск испратил порака до 46. претседател на САД веднаш по положувањето на заклетвата и изразил надеж дека Бајден ќе работи на создавањето општество со вистинска правда, слобода и почитување на правата и достоинството на секој поединец, особено на најсиромашните, најранливите и на оние кои немаат право на глас.