Во касарната „Илинден“ денеска е отворено новото заедничко стрелиште на Армијата и на МВР за гаѓање со пиштол и автомат за деветмилиметарски калибар на муниција.
Пуштањето во употреба на овој вежбовен објект, како што рекоа министрите за одбрана и за внатрешни работи, Радмила Шекеринска и Оливер Спасовски, е уште еден конкретен и важен потег во насока на остварување поквалитетна обука и подготовка на полициските и воените специјалци што е, пак, предуслов за зачувување на безбедноста на државата.
Според Шекеринска и Спасовски, модерноста на објектот, неговите техничко-тактички перформанси, согласно европските и НАТО стандардите, специфично одбрани и реализирани, гарантира не само поинтензивна, туку и специјализирана обука на оперативно делување што подразбира натамошно зголемување на професионалните капацитети на безбедносните единици.
– Немам дилема дека заеднички направивме уште еден успешен проект, насочен кон зголемување на оперативната моќ и опсегот на полициските и армиските специјалци, во нивната професионална подготвеност и обученост да делуваат во рамките на своите надлежности. Притоа, јасно го демонстриравме веќе установениот континуитет во подобрување и унапредување материјално-техничките капацитети на припадниците на двете министерства, како дел од севкупните општествени реформски зафати што ги преземаме изминативе неколку години, истакна Спасовски.
Тој напомена дека спроведувањето на законите, вклучително и на оние кои ја тангираат безбедносната сфера од живеењето, не значи само нивно нормативно почитување, туку бара и други претпоставки за да може да се гарантира оперативна ефикасност.
– Еден од тие предуслови е комбинирано и истовремено квалитетна професионална обука на сите припадници безбедносните служби, кои по словото на законите и според своите обврски и надлежности кои произлегуваат, имаат улога да бидат непосредни актери на остварувањето на безбедносната заштита на правниот поредок, на материјалните добра, на животот и сигурноста на секој наш граѓанин, рече Спасовски.
Министерот нагласи дека во организациската поставеност и на Министерството за внатрешни работи и на Министерството за одбрана, една од фундаменталните оперативни позиции им припаѓа на припадниците на специјалните единици во двете институции, полициски и воени.
– Овој заеднички проект со МВР освен што ја афирмира соработката меѓу двете водечки институции од безбедноста, значи и заштеда на ресурси и пари, но она што е важно за нас како членка на НАТО е дека ова стрелиште ќе додаде дополнителна вредност во нашата лична карта во НАТО бидејќи ќе биде и наш државен капацитет кој ќе се користи во вежбите кои ќе ги спроведуваме заедно со членките на НАТО или со некои од партнерите. Особено ми е драго што во услови на прогласена кризна состојба каде што главниот товар падна на товар на здравствените власти, но и на полицијата и на Армијата во нејзина поддршка, покажуваме дека знаеме како треба да соработуваат институции кои што се задолжени за најважните работи во државата”, рече министерката Шекеринска.
Осврнувајќи се на изминатата 2020 година, Шекеринска рече дека иако светот ќе ја памти според пандемијата, за нас не беше изгубена година.
-Од утре влегуваме во последната седмица од 2020 година, година што сакаме да ја заборавиме. Сепак, во најтешката година како држава го обезбедивме најголемиот државен успех. И во оваа 2020 која светот ќе ја памети како потрошена поради корона кризата, за нас ќе биде и година во која што после 30 години маратон успеавме да станеме 30-та членка на најмоќната воено-политичка алијанса”, подвлече Шекеринска.
На отворањето на стрелиштето присуствуваа и началникот на Генералштабот на Армијата Васко Ѓурчиновски, како и други истакнати личности од врвот на Армијата и МВР. И Шекеринска и Спасовски се согласија дека безбедносниот сегмент и натаму ќе биде во фокусот на приоритетите, како од аспект на негова натамошна модернизација согласно НАТО и ЕУ стандардите, така и од аспект на негово целосно обликување на сигурен и бескомпромисен гарант на слободата, сигурноста и безбедноста на граѓаните.