Неколку лица се повредени, а повеќе од 20 уапсени во новиот судир меѓу приврзаниците на американскиот претседател Доналд Трамп и АНТИФА на демонстрациите што се одржаа синоќа во Вашингтон.
Според американските медиуми, на насилните демонстрации учествувале повеќе од 200 членови на насилната, десничарска група „Горди момчиња“ (Proud Boys) кои се приклучија на приврзаниците на Доналд Трамп и извикувајќи пароли против Антифа, приврзаниците на новоизбраниот претседател Џо Бајден и движењето „Црните животи се важни“ (Black Lives Matter).
Судирот меѓу двете групи ескалираше синоќа, кога приврзаниците на двете групи сретнаа во еден дел од Вашингтон. Иако полицијата употреби солзавец, приврзаниците на обете групи ги продолжија судирите што се проширија низ улиците на Вашингтон.
Според последните информации објавени од полицијата во Вашингтон, неколку лица биле прободени со нож за време на демонстрациите, а повеќе од 20 лица биле уапсени.
Покрај Вашингтон, приврзаниците на Трамп организираа демонстрации низ САД, пред се во Џорџија, Невада, Аризона, Мичиген и Висконсин.
Иако сите американски држави ја прогласија победата на Џо Бајден на претседателските избори, Доналд Трамп сè уште не е помирен со поразот, ниту неговите приврзаници, кои најавија нови протести во Вашингтон и други градови во наредните денови. Тие сметаат дека имало масовна изборна измама на изборите во САД, иако за таквите тврдења не доставија докази, а сите обиди да ги оспорат изборите на суд им пропаднаа.