Земјотресот што денеска го почувствуваа граѓаните не е во никаква корелација со земјотресот што неодамна се случи во близина на Маврово, во Леуново, а беше со јачина од 4,9 степени по Рихтер, смета Михаил Гаревски, директор на Институтот за земјотресно инженерство и климатски промени.
Тој вели дека станува збор за нормална сеизмичка активност и дека иако Европско медитеранскиот сеизмолошки центар во првите неколку минути го лоцирал земјотресот во Косово, тој е од скопското трусно подрачје.
„Според бучавата која се слушна неколку секунди пред потресот, сметам дека се работи за земјотрес од скопското епицентрално подрачје. Магнитудата му е меѓу 3,4 и 3,9 степени според Рихтер и ризикот од ваков земјотрес е нула, односно освен вознемиреност кај граѓаните, не треба да предизвика други штети“, вели Гаревски за „А1он“ и додава дека по сумирањето на податоците ќе се покаже дека земјотресот настанал на скопското подрачје.
Земјотресот се случи во 14 часот и 8 минути и предизвика вознемиреност кај граѓаните, особено поради бучавата која му претходеше.
