Царината во Франција заплени најголемата пратка фалсификувани лекови кога и да е запленета на територијата на Европската унија.
Како што јави ноќта кон неделата AFP, околу 1,2 милиони дози фалсификувани лекови биле откриени на 17-ти мај во пристаништето во градот Авр на брод кој пристигнал од Кина. Пакувањата со таблетите аспирин биле маскирани под товарот на чај. Анализата покажала дека таблетите не содржат лековити супстанции, туку тие се состоеле претежно од гликоза во прав.
Според француското министерство за економија, фалсификуваниот аспирин бил наменет за испорака до магацини на шпанска фармацевтска компанија на Балеарските острови. Се претпоставува дека лажните апчиња требале да бидат дистрибуирани во Шпанија, Франција и земји во северна Африка.
Не е соопштено дали во врска со откривањето на фалсификуваните лекови има приведени лица.