Пратеничката Соња Мираковска очекува собраниската Комисија за надворешна политика набрзо да ги сослуша сите кандидати за амбасадори и земјава наскоро да испрати амбасадори во сите земји каде што се испразнети местата.
-Верувам дека тоа многу брзо ќе се направи затоа што во текот на наредната недела треба да завршиме со сите 16 амбасадори.Ни остануваат пола, пола ги поминавме, остануваат уште осум и верувам дека многу брзо ќе испратиме амбасадори во сите земји каде што се испразнети местата,изјави Мираковска..
Таа додаде дека денеска пред комисијата имаше претставување на четири идни амбасадори – во Република Албанија г. Данчо Марковски, во Република Казахстан г. Сали Лимани, во Република Косово – г-ѓа Шпреса Јусуфи и во Светата Столица – г-ѓа Марија Ефремова.
-Од овие четворица само г. Сали Лимани е човек кој не е дипломат од кариера, сите се дипломати од кариера и во едно минато време тоа не се случуваше. Имавме прилика да ги слушнеме. Навистина тоа беа компетентни претставувања на наши претставници во овие земји и во Светата Столица. Мислам дека луѓето ќе ја исполнат својата задача, рече Мираковска.
Дури и г. Сали Лимани кој не е дипломат од кариера, додаде, имаше одлично претставување на неговите тези.
-Имаше добра идеја како практично во една голема земја како Казахстан, која има огромен број на средства, фонд за учество во некоја друга земја и за инвестиции, може да има привлекување кон нашата земја. Значи, сметам дека имавме добри претставници и дека тоа ќе бидат добри идни амбасадори и претставници на Република Северна Македонија, потенциа Мираковска.